Pepe Reina, markvörður Aston Villa telur nánast öruggt að hann hafi verið og sé líklega enn með COVID-19 veiruna.

Ástæðan fyrir því að Reina veit það ekki fyrir víst er að aðeins fárveikir einstaklingar eru prófaðir á Englandi. Hann ræddi við lækni í sima og kveðst hafa verið með öll einkenni.

,,Í síðustu viku var ég með öll einkenni kórónuveirunnar, það voru erfiðir dagar. Ég gerði allt til þess að smita ekki þá sem búa með mér,“ sagði Reina.

,,Hér á Englandi ertu bara prófaður ef þú ert virkilega veikur, það benti allt til þess að ég væri með veiruna. Mér líður vel núna, þetta var erfitt. Það var eins og steypubíll hefði keyrt yfir mig.“

Reina vorkennir sér þó ekki mikið en búið er að setja á útgöngubann á Englandi. ,,Við erum í forréttinda hópi, það er ekki flókið fyrir mig að vera í sóttkví.“

,,Hetjurnar eru þær fjölskyldur sem búa í 70 fermetrum með þrjú börn. Það eru hetjur.“

,,Ég er með stórt hús, garð og það er einfalt að lifa við þær aðstæður. Ég bý í lokuðu hverfi og það eru fimm hús til viðbótar hérna, við getum farið út og tekið æfingu án þess að rekast á neinn.“