Ole Gunnar Solskjær, stjóri Manchester United, segir að VAR hafi dæmt rétt í kvöld í leik gegn Chelsea.
Það er rifist um VAR þessa stundina en margir telja að löglegt mark hafi verið tekið af heimaliðinu og að Harry Maguire hafi átt að sjá beint rautt spjald.
Solskjær er ekki sammála því og fagnar því að VAR hafi sinnt sinni vinnu í kvöld.
,,Það voru nokkrar góðar einstaklingsframmistöður í kvöld en við vorum of neikvæðir í fyrri hálfleik og sendum boltann mikið til baka,“ sagði Solskjær.
,,Við gerðum tæknileg mistök sem við gerum ekki venjulega en mörkin voru frábær.“
,,Ég vil bara að rétta ákvarðanir verði teknar og ég er ánægður með að þær hafi verið teknar.“
,,Þetta var rangstaða þegar Giroud skoraði og að mínu mati þá var það fyrra bakhrinding og ekki mark.“
,,Harry Maguire var örugglega bara að verja sig en hann setti fótinn þar sem það meiðir svo sannarlega.“
