Oliver Heiðarsson hefur ákveðið að nýta sér uppsagnarákvæði í samningi sínum við Þrótt og hefur hann tilkynnt félaginu um ákvörðun sína. Þetta herma heimildir 433.is

Þessi 19 ára sóknarmaður vakti talsverða athygli fyrir framgöngu sína með Þrótti í sumar, liðið var á barmi þess að falla úr Lengjudeildinni þegar mótið var flautað af vegna kórónuveirunnar.

Oliver skoraði fjögur mörk í 19 leikjum með Þrótti í sumar en um var að ræða hans fyrsta heila tímabil í meistaraflokki.

Ákvæðið sem Oliver var með í samningi sínum tók gildi nú í desember. Ólafur Kjartansson sem situr í stjórn knattspyrnudeildar Þróttar gat ekki svarað fyrir málið er eftir því var leitað.

Oliver ólst upp á Englandi en hann á ekki langt að sækja hæfileikana, faðir hans er Heiðar Helguson. Heiðar átti afar farsælan feril á Englandi og með íslenska landsliðinu. Líkt og Oliver þá lék Heiðar með Þrótti á sínum yngri árum.

Guðlaugur Baldursson tók við þjálfun Þróttar á dögunum en félagið hefur verið að berjast við falldraug Lengjudeildarinnar, síðustu ár.

Óvíst er hvaða skref Oliver tekur nú þegar hann hefur rift samingi sínum, en fyrr í haust heyrðust sögur af áhuga liða í efstu deild á sóknarmanninum efnilega.