Íslenska karlalandsliðið var tveimur mínútum frá því að komast inn á Evrópumótið þegar liðið mæti Ungverjalandi í gær. Ísland var 1-0 yfir fram á 88 mínútu.

Gylfi Þór Sigurðsson kom Íslandi yfir snemma leiks og staðan var 1-1 allt fram til 88 mínútu þegar Loic Nego jafnaði fyrir gestina. Íslenska liðið fékk svo gott færi til að komast aftur yfir en flóðgáttir höfðu opnast og Dominik Szoboszlai tryggði Ungverjum sigur í uppbótartíma með góðu skoti. Sigur heimamanna staðreynd.

Leikurinn var krufinn til mergjar í hlaðvarpsþættinum Dr. Football og Kristján Óli Sigurðsson sérfræðingur þáttarins setur út á valið á hópnum, enginn miðjumaður var á bekknum. „Það eru 23 í hóp, tólf varamenn og ekki einn af þeim er hreinræktaður miðjumaður,“ sagði Kristján Óli.

Kristján hefði viljað hafa reynsluboltann Emil Hallfreðsson á bekknum. „Ég hefði viljað hafa Emil Hallfreðsson í hóp, hann hefði heldur betur getað nýst þarna í gær. Hraðinn var búinn að vera fínn en það var farið að hægjast á mönnum. Emil hefði getað komið með ró inn á miðjuna.“

„Það er það eina sem hægt er að gagnrýna þjálfarana, það er að hafa ekki miðjumann í hópnum, við erum með þrjá hafsenta á bekknum.“

Kristján sagði svo að mistök hefðu verið gerð í skiptingu þegar Ari Freyr Skúlason kom inn fyrir Aron Einar Gunnarsson, seint í leiknum. „Stærstu mistökin eru að setja ekki Birki Má inn fyrir Aron og setja Gulla á miðjuna.“