Tveimur leikjum er lokið í Lengjudeild karla í dag. Keflavík styrkti stöðu sína á toppnum í deildinni með sigri á Þrótti frá Reykjavík. ÍBV gerði jafntefli á heimavelli við Þór frá Akureyri.
Í Keflavík skoraði Joseph Arthur Gibbs sitt nítjánda mark í deildinni er hann kom Keflvíkingum yfir á 16. mínútu á móti Þrótti R. Adam Árni Róbertsson tvöfaldaði síðan forystu Keflvíkinga á 23. mínútu eftir skelfileg mistök í varnarlínu Þróttara. Á 35. mínútu skallaði Nacho Heras boltann í markið eftir fyrirgjöf frá Rúnari Þór Sigurgeirssyni, staðan því orðin 3-0 fyrir Keflavík.
Joseph Gibbs skoraði síðan sitt annað mark í leiknum á 59. mínútu og kom Keflavík í 4-0. Þróttarar náðu að minnka muninn á 79. og 92. mínútu með mörkum frá Sölva Björnssyni og Esau Rojo en nær komust þeir þó ekki. Lokastaðan 4-2 sigur Keflavíkur.
Keflavík er eftir leikinn í 1. sæti Lengjudeildarinnar með 37 stig. Þróttur er í 11. sæti með 12 stig.
Í Vestmannaeyjum tóku heimamenn í ÍBV á móti Þór frá Akureyri. Nikola Stjoanovic, leikmaður Þórs, varð fyrir því óláni að skora sjálfsmark á 6. mínútu. Fannar Daði jafnaði leikinn fyrir Þór aðeins tveimur mínútum síðar.
Sito Seoane kom Eyjamönnum aftur yfir á 45. mínútu, rétt áður en flautað var til hálfleiks. Þórsarar gáfust þó ekki upp, Alvaro Montejo jafnaði leikinn á 61. mínútu með marki úr vítaspyrnu.
Halldór Páll Geirsson, markvörður ÍBV fékk síðan að líta rauða spjaldið á 84. mínútu eftir að hafa brotið á Alvaro Montejo fyrir utan teig. Fleiri mörk voru ekki skoruð í leiknum.
Eyjamenn eru eftir leikinn í 4. sæti deildarinnar með 28 stig og eru búnir að leika fleiri leiki en liðin fyrir ofan. Þeir eru 5 stigum frá sæti sem gefur þátttökurétt í efstu deild á næsta tímabili, það bil gæti stækkað í kvöld. Þór Akureyri er í 5. sæti deildarinnar með 28 stig eins og Eyjamenn.
Keflavík 4-2 Þróttur
1-0 Joseph Arthur Gibbs (’16)
2-0 Adam Árni Róbertsson (’23)
3-0 Nacho Heras (’35)
4-0 Joseph Arthur Gibbs (’59)
4-1 Sölvi Björnsson (’79)
4-2 Esau Rojo (’92 víti)
ÍBV 2-2 Þór Akureyri
1-0 Nikola Kristinn Stojanovic (‘6 sjálfsmark)
1-1 Fannar Daði Malmquist Gíslason (’14)
2-1 Sito Seoane (’45)
2-2 Alvaro Montejo (’61, víti)
Rautt spjald: Halldór Páll Geirsson, ÍBV (’84)
