Rúnar Alex Rúnarsson markvörður Dijon í Frakklandi ætti að skrifa undir samning við Arsenal í þessari viku. Félögin klára nú smáatriði sín á milli áður en Rúnar Alex skrifar undir. Þetta herma heimildir 433.is.
Arsenal seldi í dag Emiliano Martinez sem var annar kostur félagsins í markið á eftir Bernd Leno. Rúnar Alex tekur hans stöðu.
Stuðningsmenn Arsenal virðast ansi spenntir yfir því að fá Rúnar Alex til félagsins. Búið er að setja saman myndband með bestu vörslum hans sem yfir 60 þúsund manns hafa horft á.
,,Hann lítur vel út, það sem gerir þetta betra er að markmannsþjálfari Arsenal þjálfaði hann í Danmörku,“ skrifar einn af stuðningsmönnum Arsenal undir myndbandið.
Annar bendir á að hann sé ekki ósvipuð týpa og Leno. „Virðist vera Leno 2.0. Ég heyrði að kaupverðið væri 1,5 milljón punda. Þetta eru frábær kaup í varamarkvörð, hann er líka bara 25 ára,“ skrifar annar.
Bent er á að Rúnar sé frábær að verja með löppunum og með góð viðbrögð, hann sé fljótur af línunni. „Hann er hugaður markvörður,“ skrifar annar.
Bestu vörslur Rúnars má sjá hér að neðan.
