Siðanefnd Blaðamannafélagsins hefur úrskurðað að Hafliði Breiðfjörð, á Fótbolta.net og ritstjórarnir Magnús Már Einarsson og Elvar Geir Magnússon, hafi brotið siðareglur Blaðamannafélagsins með umfjöllun sinni og nafn- og myndbirtingu af knattspyrnukonunni Andreu Rán Snæfeld Hauksdóttur, leikmanni Breiðabliks í lok júní á þessu ári. Andrea kærði umfjöllun Fótbolta.net til siðanefndar.
Andrea var nafngreind af Fótbolta.net þegar hún greindist með kórónuveiruna í lok júní og aðrir fjölmiðlar vitnuðu svo í greinina sem Fótbolti.net hafði birt.
Andrea hafði komið til Íslands frá Bandaríkjunum 17 júní og lék tvo leiki með Breiðabliki eftir heimkomuna. Hún greindist með kórónuveiruna átta dögum síðar eða 25 júní. Nokkur fjöldi fór í sóttkví vegna veikinda Andreu sem hafði fengið veiruna rétt fyrir komu til landsins.
„Kvartað var til kærðu fyrir hönd kæranda sama dag og fréttin birtist og þess krafir að nafn hennar og mynd hennar yrðu afnámið úr fréttinni. Ekki var orðið við því af hálfu kærðu,“ segir í dómi siðanefndar Blaðamannafélagsins.
Siðanefndin telur að meginatriði málsins sé að nafn Andreu hafi verið birt í heimildarleysi. Siðanefnd telur að ekki hafi verið nein sérstök rök fyrir nafnbirtingu í tengslum við fréttir um smit hjá kvennaliði Breiðabliks.
„Í andsvörum kærðu sem lögmaður (Einar Páll Tamimi) ritar fyrir hönd þeirra allra, er ekki greint frá hlutverki hvers þeirra við fréttaflutning sem kært er vegna. Siðanefnd getur því ekki gert upp á milli kærðu að öðru leyti en að ekki er tilefni til að telja netmiðilinn sjálfan brotlegan,“ segir í dómnum og að það liggi fyrir að Hafliði hafi ritað fréttina. Brotið er sagt alvarlegt.