Sindri Sverrisson, blaðamaður á Morgunblaðinu, leggur orð í belg er varðar umræðuna um Hannes Þór Halldórsson, markvörð Vals og íslenska landsliðsins.
Um fátt annað hefur verið rætt síðustu daga á kaffistofum landsins, en þá staðreynd að Hannes Þór Halldórsson hafi farið í brúðkaup Gylfa Þórs Sigurðssonar.
Hannes meiddist í landsleik Íslands gegn Tyrklandi fyrir tíu dögum síðan. Sökum þess gaf Ólafur Jóhannsson, þjálfari Vals honum frí. Fríið var á sama tíma og Gylfi og Alexandra Helga giftu sig á Ítalíu. Valur var að keppa sama dag við ÍBV.
,,Hvenær er í lagi að fara í brúðkaup og hvenær er ekki í lagi að fara í brúðkaup? Þetta virðist hafa verið vinsælt umræðuefni á kaffistofum landsins síðustu daga vegna þeirrar ákvörðunar Hannesar Þórs Halldórssonar að ferðast til Ítalíu í glæsilegt brúðkaup Gylfa Þórs Sigurðssonar og Alexöndru Helgu Ívarsdóttur,“ skrifar Sindri í Morgunblaðið í dag.
,,Það er sem sagt ekki nóg með það að keppni í Pepsi Max-deild karla í sumar sé eins skemmtilega ófyrirsjáanleg og spennandi og hún hefur verið, og leikirnir margir frábær skemmtun, heldur eru núna í deildinni leikmenn sem hver einasti Íslendingur þekkir og vill taka þátt í kaffispjalli um. Það held ég að sé frábært fyrir fótboltann.“
Hjörvar kveðst ekki vera heimskur og svarar Hannesi: „Happy wife, happy life“
Meiri áhugi er á Pepsi Max-deid karla í ár en undanfarið, koma Hannesar spilar þar stórt hlutverk.
,,Auðvitað vonuðu allir að innkoma sjálfs landsliðsmarkvarðarins í deildina myndi vekja meiri áhuga á henni, og ég er viss um að það hefur gengið eftir hvort sem áhorfendatölur endurspegla það eða ekki.“
„Flestir virðast styðja Hannes í þessu óvenjulega brúðkaupsmáli en aðrir gagnrýna hann og lauma með skoti á ótrúlega stöðu Íslandsmeistara Vals, í fallbaráttu með næstflest mörk fengin á sig í deildinni. Kannski væri gagnrýnin minni ef Valur væri í toppmálum eins og búist var við fyrir tímabilið, og kannski væri stuðningurinn minni ef Hannes hefði ekki átt tvo glimrandi sigurleiki með landsliðinu fyrir brúðkaupið.“
„Það er að minnsta kosti gott að í deildinni séu slíkir stjörnuleikmenn að fólk myndi sér skoðun á því hvernig þeir hlúa að sínum meiðslum eða hvað þeir gera um helgar, en best væri að slík umræða byggðist á staðreyndum.“