Bjarki Már Sigvaldsson er látinn 32 ára að aldri en þær fréttir voru staðfestar á fimmtudaginn.

Bjarki hafði undanfarin ár barist við krabbamein og tapaði þeirri baráttu í vikunni. Hann skilur eftir sig eiginkonu og tíu mánaða gamla dóttur.

Bjarki tjáði sig ítarlega í viðtali við Ísland í dag fyrr á árinu og fékk stuðning úr öllum áttum hér heima.

Gunnleifur Vignir Gunnleifsson, markvörður Breiðabliks, setti inn afar fallega færslu á Instagram síðu sína í dag.

Þar kvaddi Gunnleifur góðan vin sinn en Bjarki er fyrrum knattspyrnumaður og spilaði með HK.

Gunnleifur birti mynd af þeim saman og heitir því að halda minningu hans á lofti.

Fallega færslu hans má lesa hér.

 

View this post on Instagram

 

Elsku fallegi vinur minn. Ég kynntist þér fyrir mörgum árum þegar þú og ég spiluðum í HK, þú í yngri flokkum og ég í meistaraflokki. Ég sá hversu mikla hæfileika þú hafðir inná vellinum og vissi að það yrði ekki löng bið þar til að þú kæmir sem ungur maður í mfl. Við æfðum, spiluðum og ferðuðumst saman, og ég sá hversu stórt hjarta þú varst með og hversu jákvæður og glaður þú varst. Ég man þegar þú kynntir Ástrósu fyrir mér, og ég sagði þér að þú hefðir dottið í lukkupottinn. Ég man þegar við fórum saman til London með HK. Ég man allar góðu stundirnar í Fagralundi. Ég man þegar þú veiktist. Þá sýndirðu mér og öllum öðrum hversu stórkostleg manneskja þú varst. Þú varst keppnismaður sem tæklaðir ósanngjarnar aðstæður af auðmýkt, ást og baráttu. Ég man þegar ég var í brúðkaupinu þínu þegar þú giftist annari hetju. Ég man þegar Emma kom í heiminn. Þú hefur kennt mér svo mikið á lífið. Ég er stoltur og þakklátur fyrir að hafa verið vinur þinn. Ég mun halda minningu þinni á lofti svo lengi sem ég lifi. Ég votta Ástrósu, Emmu, stórfjölskyldunni og öllum þeim sem eiga um sárt að binda samúð mína❤️#lífiðernúna

A post shared by Gunnleifur Gunnleifsson (@ggunnleifsson) on Jun 29, 2019 at 3:03pm PDT