Frábær leikur fór fram í Hafnarfirði í kvöld er lið FH og Stjörnunnar áttust við í Pepsi Max-deild karla.

Leiknum lauk með 2-2 jafntefli en þau komu öll í seinni hálfleik. Stjarnan komst í 2-0 áður en heimamenn jöfnuðu á aðeins tveimur mínútum.

Hér má sjá það góða og slæma úr leiknum.

Plús:

Leikurinn var gríðarlega skemmtilegur í seinni hálfleik. Fjögur mörk og brjálað fjör – geggjuð sumarskemmtun.

Hilmar Árni Halldórsson er að komast í gang og það er frábært fyrir Stjörnuna. Tvö mörk í kvöld og eitt úr víti.

FH lenti 2-0 undir en þeir svöruðu því virkilega vel. Tvö mörk á tveimur mínútum og staðan allt í einu orðin 2-2.

Brandur Olsen er frábær spyrnumaður og hornspyrnur hans björguðu kvöldinu fyrir FH. Bæði mörk liðsins komu eftir horn.

Það er auðvelt að vera reiður út í Ívar Orra dómara. Aðeins þrjár mínútur í uppbótartíma sem voru vonbrigði. Leikurinn átti skilið sigurmark, frábærar lokamínútur.

Mínus:

Þvílíkur klaufaskapur í Stjörnunni að tapa þessu niður á tveimur mínútum og hvað þá með að fá á sig tvö mörk eftir hornspyrnu.

Bæði mörkin voru klaufaleg. Það fyrra skoraði Guðmundur Steinn Hafsteinsson er hann skallaði boltann einfaldlega í eigið net. Það var virkilega furðulegt.

Þrír leikmenn meiddust í fyrri hálfleik sem er ansi spes. Hjörtur Logi Valgarðsson fór af velli hjá FH og þeir Guðjón Baldvinsson og Eyjólfur Héðinsson hjá Stjörnunni sem var áfall.

Það var svo mikið pláss fyrir bæði lið til að sækja og spila boltanum. Eins og oft áður þá vantar meiri yfirvegun í leikmenn, þeir mega alveg halda boltanum aðeins.

Steven Lennon fékk DAUÐAFÆRI í uppbótartíma. Hitti ekki boltann þegar hann var einn gegn Haraldi í markinu.