Hörður Björgvin Magnússon kom inná sem varamaður í kvöld er Ísland spilaði við Tyrkland í undankeppni EM.

Ari Freyr Skúlason fór af velli meiddur og kom Hörður inn í gríðarlega góðum 2-1 sigri.

,,Það var geggjað að vinna Tyrkina eftir að þeir unnu Frakka. Það sýnir hversu góðir við erum og góð liðsheild,“ sagði Hörður.

,,Það er alltaf erfitt að komast inn í leikinn en það gekk rosa vel í dag og ég er bara stoltur af liðsheildinni að klára þetta í lokin.“

,,Ég er bara sáttur fyrir hönd Ara að fá tækifæri sem hann nýtti og gerði vel á móti Albaníu og í dag. Auðvitað er leiðinlegt að hann hafi verið tæpur í lærinu og þurfti skiptingu.“

,,Við þekkjum það að fá mark á okkur og ekki mark á okkur á lokamínútum. Við vorum bara mjög rólegir og reyndum að kýla hann fram til að halda hreinu.“

Hörður var svo aðeins spurður út í ‘burstamálið’ sem kom upp í gær en hann segir að það hafi bara hvatt leikmennina enn frekar.

,,Þetta er bara geðveikt. Þetta peppaði okkur bara meira. Þetta er smá sokkur upp í alla sem þurfa að taka hann upp í sig.“