Hlaðvarpsþátturinn, 90 mínútur heldur áfram á fullu fjöri en um er að ræða þátt sem Hörður Snævar Jónsson, ritstjóri 433.is stýrir.

Þátturinn hefur notið mikilla vinsælda en afar áhugaverðir gestir hafa komið í þáttinn.

Gestur þáttarins að þessu sinni er Kolbeinn Sigþórsson sem er einn allra besti knattspyrnumaður sem Ísland hefur átt, þá sérstaklega þegar hann hefur klæðst treyju landsliðsins.

Kolbeinn hefur eins og flestir vita verið að glíma við erfið meiðsli síðustu ár og hefur spilað lítið af knattspyrnu.

Framherjinn spilaði síðast stórt hlutverk árið 2016 er Ísland spilaði í lokakeppni EM og var Kolbeinn þar frábær.

Meiðsli hafa sett stórt strik í reikning Kolbeins sem hefur þurft að fara í nokkrar aðgerðir vegna meiðsla.

Hann viðurkennir það að hann hafi hugsað út í það að leggja skóna á hilluna þrátt fyrir að vera aðeins 29 ára gamall.

,,Ég hef oft hugsað um það. Það er búið að segja við mig stundum að ég sé bara búinn. Farðu og pældu í því hvað er best að gera,“ sagði Kolbeinn.

,,Auðvitað hef ég pælt í því. Ég var svo lengi frá en svo gerðist ekki neitt. Það var samt aldrei viljinn eða að mig langi til að hætta.“

,,Mér fannst ég alltaf eiga þetta spil inni að fara í aðra aðgerð.“