Lionel Messi, leikmaður Barcelona, lét James Milner, leikmann Liverpool, heyra það er liðin áttust við í Meistaradeild Evrópu.

Messi var óánægður með hegðun Milner í fyrri leik liðanna í undanúrslitunum sem Barcelona vann 3-0.

Milner segir að Messi hafi kallað sig asna og var hundfúll eftir brot Englendingsins í fyrri hálfleik.

,,Hann var ekki ánægður. Hann lét mig heyra það á spænsku í leikmannagöngunum í hálfleik. Hann kallaði mig ‘burro,’ sagði Milner.

,,Það þýðir asni en ég held að það sé líka notað til að lýsa knattspyrnumanni sem hleypur um og sparkar í fólk.“

,,Ég spurði hann hvort hann væri í lagi en hann vildi ekkert með mig hafa. Ég held að hann hafi ekki fattað það að ég skildi spænskuna hans.“