Ólafur Jóhannesson, þjálfari Vals, sá sína menn tapa þriðja leik sumarsins í kvöld gegn FH.

Valur spilaði ágætlega á köflum í kvöld en það voru FH-ingar sem fögnuðu að lokum 3-2 sigri.

,,Þetta eru tvö góð lið og þetta er einhver valdabarátta um einhverjar stöður í leiknum og svona leikir vinnast oft á föstum leikatriðum,“ sagði Ólafur.

,,Spilamennskan var fín í alla staði. Það er mikið að fá á sig þrjú mörk en það er stundum svona að þegar hlutirnir eru ekki að falla fyrir manni þá er eins og allt fari á móti manni og mér finnst það vera þannig í dag.“

,,Þú uppskerir bara það sem staðan segir, þú uppskerir ekkert meira en það svo við getum ekki kvartað yfir því.“

,,Við erum bara á sama stað og í byrjun, það er ekkert vesen á okkur.“

Við spurðum Óla svo út í Gary Martin, framherja liðsins, en hann var ekki valinn í leikmannahópinn, annað skiptið í röð.

,,Nei. Ég get ekkert sagt um það,“ svaraði Ólafur en hann gat ekki tjáð sig um hvort Gary væri að æfa með félaginu eða ekki.