Gary Neville, fyrrum leikmaður Manchester United, var ekki hrifinn af Paul Pogba í gær er Chelsea kom yfir gegn liðinu á Stamford Bridge.

Antonio Rudiger kom Chelsea yfir í fyrri hálfleik með skalla eftir hornspyrnu en Pogba átti að dekka varnarmanninn.

Pogba ákvað svo að kenna Victor Lindelof um að hafa hindrað sig í teignum en Neville segir að það sé vitleysa.

,,Ég horfði á Paul Pogba og hann var sofandi. Það sem er áhugavert er hvernig hann bregst við, hverjum er hann að kenna um?“ sagði Neville.

,,Hann er að segja að Lindelof hafi hindrað sig. Fyrirgefðu Paul en hann gerði það ekki. Hann er að dekka David Luiz.“