Tveir karlkyns hrægammar í Artis-dýragarðinum í Amsterdam eignuðust heilbrigðan unga á dögunum. Í yfirlýsingu frá dýragarðinum kemur fram að starfsmenn dýragarðarins hafi fundið yfirgefið egg í búri hrægammanna og til að byrja með sett eggið í sérstaka útungunarvél.

Þeir hafi síðan ákveðið að koma egginu fyrir í hreiðri sem tveir samkynhneigðir karlfuglar höfðu útbúið. Karlfuglarnir, sem hafa verið óaðskiljanlegt par um árabil, tóku egginu fagnandi og skiptust á að sitja á hreiðrinu. Nokkru síðar klaktist heilbrigður ungi út og tóku feður hans þá þegar við að mata hann til skiptist.

Í yfirlýsingu dýragarðarins kemur fram að ekki sé óalgengt að samkynhneigðir fuglar taki saman en þetta er í fyrsta skiptu í sögu dýragarðarins að samkynheigðir fuglar kleki út eggi saman.