Sorg vegna dauða 10 ára stúlku sem var myrt á hrottalegan hátt
Mikil sorg og reiði ríkir í Albuquerque í Nýju-Mexíkó í Bandaríkjunum vegna dauða tíu ára stúlku, Victoriu Martens, sem var myrt á hrottalegan hátt á dögunum. Móðir stúlkunnar, kærasti hennar og frænka hans, hafa verið handtekin grunuð um aðild að morðið.
Rétt er að vara við lýsingum sem fylgja fréttinni.
Það var þriðjudagskvöldið að lögregla og slökkvilið voru kölluð að húsi í norðvesturhluta borgarinnar vegna reyks sem kom frá húsinu. Hrikaleg sjón blasti við viðbragsaðilum á vettvangi; sundurlimað lík ungrar stúlku lá ofan í baðkari í húsinu og búið var að bera eld að líkamsleifunum.
Að því er bandarískir fjölmiðlar greina frá leikur grunur á að Victoria, sem varð tíu ára á dögunum, hafi verið sprautuð með metamfetamíni áður en hún var misnotuð kynferðislega. Hún var svo kyrkt og stungin.
Móðir stúlkunnar, hin 35 ára Michele Martens, kærasti hennar, Fabian Gonzalez og frænka hans, Jessica Kelley, voru öll handtekin. Fabian og Michele höfðu verið saman í mánuð á meðan Jessica fékk að búa hjá þeim um tíma eftir að hafa losnað úr fangelsi nokkrum dögum fyrr.
Martens sagði við yfirheyrslur hjá lögreglu að Fabian og Jessica hefðu byrlað stúlkunni ólyfjan áður en Fabian misnotaði hana. Sjálf sagðist hún ekki hafa tekið þátt í ódæðinu. Gordon Eden, yfirmaður rannsóknardeildar lögreglunnar í Albuquerque, segir að um sé að ræða hrottalegasta glæp sem hann hefur orðið vitni að á ferli sínum hjá lögreglu.
Í umfjöllun KRQE News kemur fram að Fabian þessi hafi verið á skilorði þegar morðið var framið. Beinist rannsókn meðal annars að því hvort hann hafi brotið gegn ákvæðum skilorðsins áður en að harmleiknum á þriðjudag kom. Hafi hann gert það hefði mögulega verið hægt að koma í veg fyrir þennan hrottalega atburð.
Minningarstund var haldin í Albuquerque í gærkvöldi þar sem skólafélagar Victoriu og fjölskyldur þeirra komu meðal annars saman. „Hún átti mjög auðvelt með að fá fólk til að brosa. Hún var mjög indæl stúlka,“ sagði skólafélagi stúlkunnar í samtali við KOB-4 sjónvarpsstöðina.
Þremenningarnar eiga yfir höfði sér lífstíðarfangelsi, en dauðarefsing var afnumin í Nýju Mexíkó árið 2009.
