John „Sib“ Hashian, fyrrverandi trommuleikari rokkhljómsveitarinnar Boston, varð bráðkvaddur um borð í skemmtiferðaskipi á miðvikudag. Hann var 67 ára gamall.

AP-fréttastofan hefur eftir syni hans Adam að dánarorsök liggi ekki fyrir en trymbillinn átti að koma fram í Legends of Rock-skemmtisiglingunni sem hélt frá Miami síðastliðinn laugardag og átti að koma við í Púertó Ríkó og Bahamas-eyjum.

Hashian var meðal stofnmeðlima Boston og sló taktinn á fyrstu tveimur plötum sveitarinnar goðsagnakenndu, þar á meðal samnefndri fyrstu plötu Boston sem innihélt meðal annars slagarann „More Than a Feeling“ árið 1976. Sú plata seldist í 17 milljónum eintaka. Önnur plata sveitarinnar, „Don‘t Look Back֧“ kom út árið 1978.