Netnotendur mega endurbirta og breyta verkunum án nokkurra takmarkana
Eitt mikilvægasta listasafn heims Metropolitan-listasafnið í New York hefur nú sett 375 þúsund ljósmyndir af verkum í sinni eigu á internetið og gert þær aðgengilegar í skapandi almenningi (e. creative commons).
Þar með geta netnotendur leitað, skoðað, hlaðið myndunum niður í góðum gæðum og notað á hvern þann hátt sem þeim dettur í hug – endurbirt og breytt án nokkurra takmarkana. New York Times hefur eftir yfirmanni verkefnisins, Loic Tallon, að markmið safnsins sé að gera „allt eins aðgengilegt og mögulegt er.“
Áður hafa Rijksmuseum í Amsterdam í Hollandi og National Gallery of Art í Washington gert myndir af sínum verkum aðgengileg á sama hátt, en fjöldi þeirra mynda kemst ekki í hálfkvisti við þann fjölda sem Met hefur gert aðgengilegan.
Myndirnar má nálgast á https://ccsearch.creativecommons.org/
