Johannes Paul Raether þurfti að hætta við síðasta hluta gjörnings síns
Gjörningalistamaðurinn Johannes Paul Raether var rekinn úr afgreiðslu Bláa lónsins og eltur út af svæðinu þegar hann framkvæmdi gjörninginn Protekto.x.x. Absurd Alloy (5.5.5.4), sem var hluti af tón- og myndlistarhátíðinni Cycle á föstudag.
Um var að ræða hluta í gjörningaröð þar sem Johannes, í hlutverki tækninornarinnar Protecto x.x., heimsækir og rannsakar staði sem tengjast hinum ýmsum frum- og jarðefnum sem eru falin í þeim tækjum og tólum sem nútímamenn notast við dagsdaglega.
Heil rúta af áhorfendum elti Protekto x.x. í álverið í Straumsvík þar sem hópurinn fékk leiðsögn og því næst í Bláa lónið. Þar voru viðtökurnar ekki jafn vinalegur, en þegar listamaðurinn reyndi að næla sér í kísil úr lóninu var hann stöðvaður af starfsmanni. Því næst skoðaði listamaðurinn sig um í verslun Bláa lónsins en var þá vinsamlegast beðinn um að yfirgefa bygginguna – enda þyrfti leyfi fyrir slíkum uppákomum.
Næst ætlaði listamaðurinn að baða sig í litlum kísilfylltum polli utan baðsvæðis Bláa lónsins en neyddist til að hætta við eftir að öryggisvörður elti rútuna af svæðinu.