Tónlist Bjarkar og nýjasta tölvutækni mætast í Björk Digital
Sýndarveruleikasýningin Björk Digital, eða Stafrænn heimur Bjarkar, þar sem tónlist Bjarkar og nýjustu tölvutækni er skeytt saman verður sett upp á þremur hæðum Hörpu í nóvember. Sýningin verður opnuð um leið og tónlistarhátíðin Iceland Airwaves hefst, en Björk heldur einmitt tvenna tónleika á hátíðinni í ár. Sýningin hefur þegar hefur ferðast til Ástralíu, Japan en stendur nú yfir í Somerset house í London.
Samkvæmt tilkynningu fá gestir sýningarinnar að „kynnast tónheimi Bjarkar á alveg nýjan hátt með því að njóta verka sem hún hefur gert í samvinnu við nokkra framsæknustu leikstjóra og forritara á sviði sýndarveruleika.“
Síðasta plata tónlistarkonunnar, hin mjög persónulega Vulnicura, er grunnurinn að sýningunni þar sem möguleikar sýndarveruleika og tónlistar eru kannaðir. Á sýningunni geta gestir einnig upplifað gagnvirka margmiðlunarverkið Biophilia, en í því verki renna náttúra, tónlist og tækni saman í eitt. Þar að auki hafa 29 lög frá ferli Bjarkar verið sérstaklega endurhljóðblönduð fyrir 5.1 hljóðkerfi og verður hægt að hlýða á því í þar til gerðu kvikmyndaherbergi.