Myndband af kvæntum karlmanni biðja um símanúmer stúlku undir lögaldri hefur vakið talsverða athygli á erlendum netmiðlum. Myndbandið var upphaflega birt á YouTube-síðunni To Catch a Cheater, en á því sést kona mannsins, Ellen að nafni, leita til vefsíðunnar vegna gruns um að eiginmaðurinn væri ekki allur þar sem hann er séður.

Ellen segir að grunur hafi vaknað þegar nágranni bankaði upp á og tjáði henni að kynferðisbrotamaður væri skráður til heimilis á heimilinu. Ellen kom af fjöllum en spurði eiginmann sinn út í málið. Segir Ellen að hann hafi tjáð henni að um smávægilegt mál hafi verið að ræða sem hafi auk þess gerst fyrir löngu. Ekki fylgir sögunni hvaða brot maðurinn á að hafa verið dæmdur fyrir.

Á myndbandinu sést maðurinn svo sitja í almenningsgarði þar sem hann gefur öndum brauð. Átján ára stúlka, tálbeita frá To Catch a Cheater, sést vinda sér upp að honum og gera sér dælt við hann. Maðurinn virðist vera var um sig, spyr hana hvort hún geri þetta oft, að gefa sig á tal við ókunnuga karlmenn og spyr hvort foreldrar hennar séu með henni. Í lok myndbandsins sést maðurinn svo biðja um símanúmer stúlkunnar, en stúlkan tekur fram í myndbandinu að hún sé sextán ára.

Í lok myndbandsins virðist maðurinn svo átta sig á því að um tálbeitu sé að ræða því hann kemur auga á upptökubúnað sem stúlkan var með á sér. Hvað sem því líður var eiginkona mannsins, Ellen, í áfalli og mjög brugðið. Í myndbandinu er svo tekið fram að hjónin séu enn gift og séu nú í hjónabandsráðgjöf. Í frétt Mail Online kemur fram að miðlinum hafi ekki tekist að sannreyna að maðurinn sé í raun dæmdur kynferðisbrotamaður.

Myndbandið má sjá hér að neðan: