Dagur B. Eggertsson, borgarstjóri og oddviti Samfylkingarinnar, var að vonum ekki sáttur með að sjá meirihlutann falla í borginni og að hans eigin flokkur hafi tapað rúmum sex prósentustigum. Samfylkingin bætir reyndar við sig tveimur borgarfulltrúum en fulltrúum alls var fjölgað um átta. DV spurði Dag um niðurstöður kvöldsins og næstu skref.

Þetta eru slæmar tölur fyrir ykkur er það ekki?

„Ég hef þá aðferð að búa mig undir það versta og þetta er það. Maður verður að vera undirbúinn undir að taka niðurstöðum sem þessum.“

Nú eru Viðreisn komnir í oddastöðu. Sérðu fyrir þér að bæta þeim inn í núverandi samstarf?

„Ég hef sagt það alla kosningabaráttuna að ég vildi sjá núverandi meirihlutaflokka halda áfram, jafn vel með fleiri flokkum sem hugsa líkt og horfa til svipaðrar framtíðar og við. Við höfum góða reynslu af því og gengum til samstarfs við fleiri flokka en þurfti eftir síðustu kosningar. Það hefur reynst mjög vel. Viðreisn er samt ekki eini flokkurinn sem hugsanlegt er að bæta inn í samstarfið, það geta hugsanlega verið fleiri.“

Dagur bendir á viðræðurnar árið 2014 þegar Besti flokkurinn varð að Bjartri Framtíð og Vinstri Grænum og Pírötum var bætt inn í meirihlutasamstarfið.

„Þá bjuggum við til nýjan meirihluta og það þarf að gerast aftur. Við þurfum að búa til nýjan meirihluta.“