Stefán Karl Stefánsson hefur lokið öllum krabbameinsmeðferðum og einbeitir sér nú að því að koma sér á fætur á ný. Leikarinn ástsæli greinir frá þessum gleðifréttum á facebooksíðu sinni þar sem hamingjuóskum rignir yfir hann og fólk keppist við að senda honum hlýjar kveðjur.
Greint var frá því í september á síðasta ári að Stefán Karl hefði greinst með æxli í brishöfði, eða svokallað gallgangakrabbamein. Hann lagðist í kjölfarið á skurðarborðið og hefur undanfarna sex mánuði gengist undir krefjandi lyfja og geislameðferð.
Í umræddri færslu segir Stefán Karl að hann hafi tekið í hönd læknis í morgun sem staðfesti við hann að ferlinu væri nú loksins lokið.
„Þetta er búið að vera löng og ströng rúmlega sex mánaða meðferðar-hryna en nú tekur við að koma sér á fætur aftur. Geislarnir halda áfram að virka og hafa áhrif á mig í einhverja mánuði en ég get lofað ykkur því að ég verð kominn upp á fætur áður en langt um líður, ég nenni ekki að liggja mikið lengur með tærnar upp í loft,“
Stefán kveðst nú ætla að hefjast handa við að byggja sig upp eftir þetta áfall. Um leið þakkar hann öllum þeim sem sýnt hafa honum stuðning í gegnum þessa erfiðu lífsreynslu og eins og við er að búast er stutt í húmorinn:
„Takk fyrir allan stuðninginn og klappið á bakið, það er ómetanlegt þegar maður gengur í gegnum svona nokkuð og þó svo að ég sé ekki alveg staðinn 100% upp þá minni ég á að ég er alveg kaffitækur og á röltinu þrátt fyrir að vera svolítið slappur,“ ritar Stefán og bætir við: „Sjáumst svo hress á röltinu í sumarblíðunni.“