HB Grandi áformar að láta af botnfiskvinnslu á Akranesi. Þar starfa nú um 270 starfsmenn innan samstæðu HB Granda, þar af starfa 93 við botnfiskvinnsluna. Það eru margir sem eiga því hættu á að missa vinnuna. Bæjarstjórn Akranesbæjar hefur lýst yfir vilja til að bæta hafnaraðstöðu við höfnina og hefur biðlað til HB Granda að fresta áformum sínum og endurskoða þau. Hefur þessi ákvörðun HB Granda vakið deilur og vilja þeir sem gagnrýna fyrirtækið að með þessu sé verið að kúga Akranesbæ í rándýrar framkvæmdir.
Kristján Berg Ásgeirsson, eða fiskikóngurinn eins og hann er gjarnan kallaður hefur nú boðið fólki á Akranesi sem gæti hugsanlega misst vinnuna að starfa fyrir hann. Í samtali við DV segir Kristján:
„Mig vantar einn til tvo handflakara og svo tvo í búðina. Þá vantar jafnvel bílstjóra og tvær þrjár stelpur eða stráka til að snyrta,“ segir Kristján sem er með 25 manns í vinnu. Hann hafði áður tjáð sig á samskiptamiðlum en hann skrifaði á Facebook:
„Ef það eru starfsmenn sem vinna á Akranesi og eru að missa vinnuna, þá mega þeir endilega tala við mig. Mig vantar starfsfólk í fiskverslunina, snyrtingu, og handflakara. Jafnvel bílstjóra. Kristján: 896 0602 kristjan@fiskikongurinn.is Endilega deila til fólksins á Akranesi. Með fyrir fram þökk. Kristján Fiskikóngur.“