Róbert Ragnarsson, bæjarstjóri Grindavíkur, er fluttur úr Grindavík. Róbert hefur verið bæjarstjóri í Grindavík frá árinu 2010 en áður var hann bæjarstjóri í Vogum.
Róbert greinir frá þessu á Facebook-síðu sinni þar sem hann segir að eðlilega finnist mörgum þetta nokkuð fjarstæðukennt, en valið hafi í raun verið einfalt.
„Eðlilega finnst mörgum þverstæðukennt að ég hvetji fólk til þess að búa í Grindavík á sama tíma og ég flyt sjálfur úr bænum. Mínar aðstæður eru hinsvegar þannig að börnin mín og konan sem ég elska búa á höfuðborgarsvæðinu. Þegar valið stendur milli þess að vera nálægt vinnunni, eða þeim sem ég elska, þá er svarið einfalt,“ segir hann.
Hann segir í færslunni að honum hafi liðið mjög vel í Grindavík. Þar hafi hann meðal annars átt gott hús og góða nágranna.
„Ég hef tekið virkan þátt í samfélaginu, sem foreldri í skóla- og íþróttastarfi, sem stuðningsmaður og almennt sem íbúi. Ég mun sakna þess að búa í Grindavík. Ég hef undanfarin 6 ár unnið að því að fjölga störfum í Grindavík, og hvatt eindregið til þess að starfsmenn stofnana og fyrirtækja kjósi að búa í Grindavík,“ segir Róbert og bætir við, að eigin sögn, að það hafi tekist með ágætum.
„Ég er þakklátur fyrir þann tíma sem ég og strákarnir mínir höfum átt í Grindavík, en veit að okkur mun líka líða vel í borginni. Ég mun eftir sem áður vinna að hagsmunum bæjarins sem bæjarstjóri í Grindavík.“