Á laugardaginn hefst viðburður sem á sér ekki fordæmi á Íslandi, ráðstefna fyrir „nördisma“ af öllu tagi. Ber hún nafnið Midgard og er samstarfsverkefni ýmissa aðila. Slíkar ráðstefnur þekkjast víða um heim og nú gefst Íslendingum tækifæri á að sjá alls kyns viðburði og taka þátt í keppnum. Ráðstefnunni lýkur á sunnudag.

Þekktir erlendir gestir munu koma fram. Má meðal annars nefna Youtube stjörnurnar Tom Vasel og Zee Garcia frá rásinni The Dice Tower sem fjalla um borðspil. Munu þeir einnig grípa í nokkur spil með aðdáendum.

Einnig má nefna myndhöggvarann Brian Muir, sem hannaði búning Darth Vader og fleiri úr Star Wars seríunni, Friðrik Þór Friðriksson leikstjóra og raddleikarann Nick Jameson sem hefur talaði inn á fjölda teiknimynda og tölvuleikja.

Það verður einnig margt annað fyrir ráðstefnugesti að gera og sjá. Til dæmis víkingabardagar, borðspilamót, listasýningar, kennsla og cosplay-keppni. Hugleikur Dagsson lýkur ráðstefnunni á sunnudagskvöld með uppistandi. Það ættu því allir sem hafa eitthvað „nördaáhugamál“ að finna eitthvað við sitt hæfi á Midgard.