Hljómsveitin Sálin hans Jóns míns fagnar í ár 30 ára afmæli, en hljómsveitin var stofnuð þann 10. mars 1988 þegar Sálin hans Jóns míns kom fram í fyrsta skipti, í Bíókjallaranum, undir Tunglinu við Lækjargötu, hvar áður hét Nýja bíó. Haldið var upp á sjálfan afmælisdaginn 10. mars síðastliðinn með veglegum tónleikum í Valshöllinni að Hlíðarenda.
En nú hyggst hljómsveitin kveðja og af því tilefni verður blásið til viðhafnartónleika í Eldborgarsal Hörpu þann 20. október. Verða þetta jafnframt kveðjutónleikar sveitarinnar, því að þeim loknum setja Sálverjar punkt fyrir aftan viðburðaríkan feril. Á þessum tónleikum verður boðið upp á það besta úr öllum Sálaráttum, til að mynda sérvalin númer af „rafmagnslausu“ tónleikunum „12. ágúst ’99“ og úrval laga í gospel-útsetningum, svo nokkuð sé nefnt.
Til fulltingis Sálverjum verða blásarar, gospelkór og fjölskipuð strengjasveit undir dyggri stjórn Atla Örvarssonar, sem lék með Sálinni um skeið, áður en hann braust til metorða í vesturheimi og skipaði sér á bekk með fremstu sjónvarps- og kvikmyndatónskáldum nútímans.
Þá má gera ráð fyrir því að óvæntir gestir setji mark sitt á kvöldið.
Ekkert verður til sparað hljóð- sem myndrænt til að gera þessa sögulegu kvöldstund eftirminnilega fyrir dygga Sálar-áhangendur.
Miðasala hefst þann 20. júní og fer fram á vefsvæðunum harpa.is og tix.is.