„Hjartað er alltaf í Eyjum. Hérna er ég borinn og barnfæddur og hérna mun ég alltaf eiga heima,“ segir ævintýralega hress Snorri Óskarsson, betur þekktur sem Snorri í Betel, í samtali við DV. Snorri hefur snúið aftur heim til Vestmannaeyja þar sem hann hyggst starfa við ferðaþjónustu. „Ég mun starfa sem leiðsögumaður í sumar hjá Viking Tours. Það er tímabundið starf til að byrja með. Fyrstu ferðamennirnir sem ég tek á móti eru væntanlegir á næstu dögum og ég hlakka mikið til,“ segir Snorri.
Hann segist hafa neyðst til þess að reyna fyrir sér á nýjum vettvangi því enginn hafi viljað ráða hann sem kennara. Eins og frægt er var Snorra sagt upp störfum sem kennara hjá Brekkuskóla á Akureyri árið 2012. Ástæðan var sú hann skrifaði um samkynhneigð út frá sínu strangkristna hugarfari á persónulega bloggsíðu. Uppsögnin var dæmd ólögmæt, bæði í héraði og í Hæstarétti og í nóvember 2017 fékk Snorri dæmdar bætur upp á um 7 milljónir króna. „Því var áfrýjað til Hæstaréttar og ég er að bíða eftir því að málið verði tekið fyrir þar í haust,“ segir Snorri.
Hann segist vera maður einsamall í eyjunum fögru í sumar en eiginkona hans dvelji á fastalandinu. „Það má segja að ég feti í fótspor Jóns Indíafara í þeim efnum. Hann kom sem slasaður hermaður til Vestmannaeyja og sá um púðurgeymsluna og fallbyssuna á Skansinum í kringum 1640. Eiginkonu hans líkaði hins vegar illa í Eyjum og skildi hann einan eftir,“ segir Snorri og hlær dátt.