Það eru til góðir vinir, frábærir vinir og svo er það hann George Clooney. Frásögn eins af bestu vinum Clooneys, viðskiptajöfursins Rande Gerber, á atviki sem varð 27. september árið 2013 hefur vakið mikla athygli. Það kvöld bauð Clooney bestu vinum sínum í kvöldmat.

„Við köllum okkur Strákana. George hringdi í mig og strákana og sagði okkur að taka 27. September 2013 frá því okkur væri boðið í kvöldmat heim til hans.“

Þegar hópurinn mætti til Clooneys tóku á móti þeim fjórtán skjalatöskur sem stóðu á borðinu. Clooney sagði þeim að opna töskurnar og blöstu þá við peningaseðlar í kílóavís, eða ein milljón dala í tuttugu dala seðlum.

„George útskýrði þetta og sagði að vinskapurinn væri honum mikils virði,“ sagði Rande við E! News. Clooney hefði nefnt að hann hefði oft fengið að gista heima hjá þeim á hans yngri árum, þegar hann var að reyna að fóta sig í hörðum heimi Hollywood. Peningarnir væru þakklætisvottur því vinirnir hefðu reynst honum svo vel og staðið með honum í gegnum súrt og sætt.

Gerber segir að nokkrir í vinahópnum séu ekki beint sterkefnaðir og því hafi peningarnir komið sumum betur en öðrum. Einn í hópnum vann á bar á flugvelli í Texas og átti í erfiðleikum með að láta enda ná saman. Það kom sér því vel að fá eina milljón dala á einu bretti. Sjálfur er Gerber efnaður en hann er kvæntur leikkonunni og fyrirsætunni fyrrverandi Cindy Crawford. Gerber sagði Clooney að hann gæti ekki tekið við þessum peningum, en Clooney þá sagt að ef hann tæki þá ekki fengi enginn þá.

Gerber ákvað því að taka við peningunum en lét þá renna óskipta til góðgerðarmála.

„Svona er George. Þetta var 27. september 2013. Þann 27. september 2014 kvæntist hann Amal. Það myndi ég kalla gott karma.“