Crocs skór eru litríkir og praktískir en í versta falli geta þeir verið skaðlegir fyrir fætur fólks. Fjöldi bandarískra lækna varar nú fólk við að nota hina vinsælu Crocs en þessari skótegund má kannski líkja við skó sem eru mitt á milli sandala og tréskóa.
Crocs skór litu dagsins ljós í Flórída í Bandaríkjunum 2002 og síðan þá hafa rúmlega 300 milljónir Crocs selst. Margir læknar hafa varað við notkun þeirra og segja þá geta verið skaðlega fyrir líkamann, að minnsta kosti ef þeir eru notaðir í margar klukkustundir daglega.
Læknarnir segja þó að það sé ekkert að því að smeygja sér í Crocs til að fara stutta vegalengd, eins og út með ruslið eða að grillinu, en það eigi alls ekki að fara í þeim í langar gönguferðir. Megan Leahy, hjá Illionis Bone and Joint Institute, sagði að því miður væru Crocs ekki hannaðir til notkunar allan daginn.
Hún sagði að þeir veittu hælunu ekki stuðning og því „grípi“ fólk „yfirleitt með tánum“. Þetta getur að hennar sögn haft áhrif á sinar, neglur og gert húðina harða. Alex Kor, formaður American Academy of Podiatric Sports Medicine, tók í sama streng í samtali við Huffington Post. Hann sagði að það gæti þó verið gott fyrir fólk sem er með mikinn bjúg á fótum og ökklum að ganga í Crocs skóm.