„Þá er þetta orðið opinbert. Við Baltasar Kormákur erum að skrifa sjónvarpsþætti upp úr uppáhalds skáldsögu okkar beggja: Sjálfstæðu fólki eftir Halldór Laxness,“ segir í tilkynningu frá glæpasagnahöfundinum vinsæla, Lilju Sigurðardóttir. Greint er fá verkefninu á vefnum cinemascandinavia.com.
Lilja segir enn fremur:
„Það er sérstakur heiður að takast á við þetta verkefni og við erum bæði með mikinn metnað til þess að vanda okkur og gera þetta fallega. Bjartur í Sumarhúsum er sjálf þjóðarsál Íslendinga og að auki eru svo margir utan Íslands með sýn á þessa sögu þar sem hún var til dæmis metsölubók í Bandaríkjunum á sínum tíma. Ég er í þessu ferli núna búin að lesa bókina sirka sjö sinnum í viðbót og er sífellt að rekast á eitthvað nýtt. Algjörlega magnað verk sem verður stórkostlegt að sjá í nýjum miðli.“