Gylfi Þór Sigurðsson, leikmaður íslenska landsliðsins og Everton, er góðhjartaður maður og sannaði það á dögunum.

Dagmar Ýr er móðir Gunnars Holger en hann er aðeins sex ára gamall og hefur þurft að glíma við alvarlegt einelti á sinni skólagöngu.

Vísir.is ræddi við Dagmar í nóvember og talaði hún á meðal annars um að Gunnar hefði fengið morðhótanir. Hann er í fyrsta bekk.

Eftir að hafa séð fréttirnar hafði Gylfi samband við móðurina og var þeim boðið að kíkja út á leik með Everton.

Dagmar greindi sjálf frá þessu á Facebook síðu sinni í kvöld en Gunnar fékk tækifæri á að heimsækja æfingasvæði Everton og eyða tíma með okkar besta knattspyrnumanni.

Færslu Dagmars má sjá hér.

Geggjuð ferð að baki!

,,Í nóvember, í kjölfarið af fréttunum af Gunnari Holger, hafði Gylfi Þór Sigurðsson samband við mig. Hann vildi bjóða Gunnari á Everton leik, því honum þótti svo leiðinlegt að heyra hvernig þetta væri hjá Gunnari í skólanum,“ skrifar Dagmar.

,,Gylfi bauð okkur Gunnari til Liverpool á leik hjá Everton. Hann reddaði því líka að Gunnar fengi að koma á æfingarsvæðið hjá Everton að horfa á æfingu hjá þeim.“

,,Eftir æfinguna þá kom Gylfi og spjallaði við Gunnar og Gunnar gaf honum innrömmuð fótboltaspjöld af sér. Gylfi áritaði takkaskónna hans Gunnars og landsliðsbolina okkar.“

,,Daginn eftir var svo leikurinn og þvílík upplifun sem það var! Vorum í Sky Sports Studio boxinu, með mat og drykki eins og við vildum.“

,,Eftir leikinn þá vorum við Gunnar sótt upp í boxið og Gylfi spjallað við Gunnar, labbaði með okkur útá fótboltavöllinn og gaf honum treyjuna sem hann var í á leiknum, áritaða.“

,,Gylfi sagði við Gunnar að hann þyrfti að vera oftar á leik hjá þeim því þeir unnu loksins. Gunnar heldur því fram núna að hann sé lukkudýr Everton, að hann þurfi að vera á öllum leikjum Everton og að liðið eigi hann.“

,,Þetta var svo trufluð upplifun og geggjað að sjá Gunnar svona hamingjusamann.“

,,Takk, takk, takk fyrir allt Gylfi. Takk, Gylfi, fyrir að gera barnið mitt að hamingjusamasta barni sem ég hef séð í langan tíma.“