Andri Rúnar Bjarnason, framherji Helsingborg í Svíþjóð, var í dag valinn leikmaður ársins hjá félaginu.

Þetta eru frábærar fréttir fyrir Andra en hann var einn allra besti leikmaður sænska liðsins á tímabilinu.

Andri spilaði stórt hlutverk fyrir Helsingborg sem náði að tryggja sæti sitt í efstu deild í Svíþjóð á ný.

Framherjinn skoraði 14 mörk í deildinni og lagði upp önnur sjö á liðsfélaga sína sem er magnaður árangur.

Andri kemst því í hóp með leikmönnum á borð við Henrik Larsson sem vann verðlaunin þrisvar á ferlinum.

Larsson er einn besti leikmaður í sögu Svíþjóðar og spilaði með liðum eins og Barcelona og Manchester United.