Usain Bolt vann sín önnur gullverðlaun á Ólympíuleikunum í Río í nótt þegar hann kom fyrstu í mark í 200 metra hlaupi. Tími hans var 19,78 sekúndur sem er ekkert sérstakur tími og var langt frá sínu besta á þessari vegalengd. Heimsmet hans er 19,19 sem hann setti í Berlín 2009. Kanadamaðurinn Andre de Grasse varð í öðru sæti í hlaupinu og Christophe Lemaitre frá Frakklandi varð þriðji.

Bolt, sem verður þrítugur á sunnudaginn kemur, sagði eftir hlaupið að það hefði verið gaman að vinna en tíminn væri ekkert til að hrópa húrra fyrir.

„Ég er ekkert unglamb lengur og við göngum ekkert að því vísu að ég verji þessa titla mína á næstu leikum. Það kostar mikla vinnu að vera fremsti hlaupari í heiminum. Ég hef lagt mikið á mig en auðvitað er maður að eldast. Ég vissi alveg að ég var ekki að fara að setja heimsmet í þessu hlaupi. Ég hlustaði á líkamann, hraðinn í hlaupinu nægði til sigurs og það skipti öllu máli,“ sagði Bolt eftir sigurinn í nótt.

Bolt vann gullverðlaunin í 100 metra hlaupi á leikunum og gæti bætt þeim þriðju við í safnið sitt þegar hann hleypur 4×100 metra boðhlaup fyrir sveit Jamaíka um helgina. Ef það gengur eftir yrði hann fyrsti hlauparinn til að vinna gullverðlaun í þessum þremur hlaupum á ólympíuleikum.