Marieke Vervoort þjáist af ólæknandi vöðvarýrnunarsjúkdómi
Marieke Vervoort vann til silfurverðlauna í hjólastólakappakstri á Ólympíumóti fatlaðra í Rio de Janeiro á dögunum. Marieke þjáist af ólæknandi vöðvarýrnunarsjúkdómi sem að lokum mun draga hana til dauða.
Áður en að því kemur ætlar Marieke að velja líknardauða, en árið 2008 skrifaði hún fyrst undir nauðsynlega pappíra þar að lútandi. Getgátur voru uppi í belgískum fjölmiðlum að hún myndi láta verða af þessum áformum sínum eftir Ólympíumótið, en Marieke segist ekki vera tilbúin til að deyja strax.
„Ég nýt hvers augnabliks, enn sem komið er,“ sagði hún á blaðamannafundi, en Marieke vann sem áður segir til silfurverðlauna í 400 metra hjólastólakappakstri.
„Þegar augnablikið kemur, þegar ég mun eiga fleiri slæma daga en góða, þá er ég með pappírana til taks. En sá tími er ekki kominn,“ sagði hún.
Líknardauði er sem kunnugt er löglegur í Belgíu. Marieke er 37 ára gömul en hún greindist með sjúkdóminn þegar hún var fjórtán ára. Sjúkdómurinn getur verið sársaukafullur og veldur hann meðal annars tímabundinni lömun og svefnleysi.
Síðan hún greindist hefur líf hennar verið stanslaus barátta, en hún hefur ekki látið sjúkdóminn aftra sér frá því að verða afreksmaður í íþróttum. Hún vann til tvennra verðlauna á Ólympíumóti fatlaðra í Lundúnum árið 2012; gull í 100 metra hjólastólakappakstri og silfur í 200 metra kappakstri.
Æfingarnar og keppnirnar hafa þó tekið sinn toll og sagði hún við blaðamenn í Rio að keppnin í ár hefði verið hennar síðasta.