Ólympíuskákmótið er hafið í allri sinni dýrð í Bakú, höfuðborg Aserbaídsjan. Ísland sendir tvö landslið til leiks, annað í opnum flokki þar sem fimm sterkustu skákmenn hverrar þjóðar taka þátt, óháð aldri eða kyni, og hitt í sérstökum kvennaflokki. Frammistaða íslensku sveitanna eftir fjórar umferðir af ellefu hefur verið góð og sérstaklega hefur kvennaliðið farið gjörsamlega á kostum og lagt landslið tveggja sterkra skákþjóða.

Þrír stórmeistarar Þeir eru óárennilegir íslensku stórmeistararnir. Reynsluboltarnir Hannes Hlífar Stefánsson og Jóhann Hjartarson eru á 1. og 3.borði. Yngsti stórmeistari þjóðarinnar, Hjörvar Steinn Grétarsson, situr fyrir miðju á 2.borði og hefur farið hamförum í Bakú og unnið allar sínar skákir, fjórar að tölu.

Hjörvar og Bragi með fullt hús

Teflt er á fjórum borðum í hverri viðureign og í fyrstu umferð völtuðu íslensku hrímþursarnir yfir slakt lið Eþíópíumanna 4-0. Í annarri umferð tapaði liðið fyrir Tékklandi 1-3 en síðan bitu Íslendingar í skjaldarrendur og gjörsigruðu landslið Sýrlands 3,5-0,5. Ekki var frændseminni fyrir að fara í fjórðu umferð en þá voru Færeyingar kafsigldir með sama skori. Sex stig af átta í húsi og liðið er í góðri stöðu í efri hluta mótsins. Stórmeistarinn Hjörvar Steinn Grétarsson hefur staðið sig frábærlega á öðru borði en hann státar af fullu húsi, 4 vinningum í fjórum skákum. Sömu sögu er að segja af varamanninum Braga Þorfinnssyni en hann hvíldi gegn Tékkum og er því með 3 vinninga í þremur skákum.

Bananar og þolinmæði Varamaðurinn Bragi Þorfinnsson hefur staðið sig óaðfinnanlega það sem af er og unnið allar þrjár skákir sínar í mótinu. „Ég tek Sjúrð á þolinmæðinni,“ sagði hann fyrir skák sína gegn Færeyingnum seiga, sem þurfti að gefast upp eftir fjórar þjáningaríkar klukkustundir.

Frábær árangur kvennaliðsins

Í fyrstu umferð gjörsigraði kvennaliðið landslið Maldíveyja 4-0. Sú gleði stóð ekki lengi því 4-0 tap gegn ítalska landsliðinu var næst á dagskrá. Íslensku jötunmeyjarnar rifu sig hins vegar upp í þriðju umferð og höfðu sigur gegn Englandi sem hafði á að skipa mun sterkara liðið á pappírum. Pappírarnir tefla blessunarlega ekki. Þær voru síðan hvergi nærri saddar því í fjórðu umferð vannst frábær sigur á sterku landsliði Moldavíu. Liðið er nú með sex stig af átta mögulegum og er í hópi efstu sveita. Lenka Ptacnikova og Hallgerður Helga Þorsteinsdóttir fara fyrir liðinu með 3 vinninga í fjórum skákum.

Íslensku liðin tefla við landslið Eistlands og Mexíkó í fimmtu umferð. Hægt er að fylgjast með viðureignunum í beinni útsendingu á skak.is og hefjast þær kl.11.00.