Spænska blaðið AS fullyrðir að það verði tilkynnt í dag hvert næsta verkefni Portúgalans José Mourinho verður.
Mourinho hefur verið orðaður við stjórastöðuna hjá Manchester United undanfarna mánuði, en liðið leikur í dag til úrslita við Crystal Palace í ensku bikarkeppninni.
AS fullyrðir að það verði tilkynnt eftir bikarúrslitaleikinn að Mourinho taki við stjórnartaumunum á Old Trafford. Samkvæmt frétt blaðsins mun Mourinho skrifa undir þriggja ára samning við United sem mun færa honum fimmtán milljónir evra í árslaun.
Gengi Manchester United á leiktíðinni hefur valdið stuðningsmönnum félagsins vonbrigðum, en liðið endaði í 5. sæti ensku úrvalsdeildarinnar.
