,,Þetta var gaman að fá maríulaxinn með góðri aðstoð Ásgeir Heiðars, bara veitt silunga áður,“ sagði Reykvíkingurinn ársins brúðubílstjórinn Helga Steffensen sem landaði fyrsta laxinn sumarsins í Elliðaánum í morgunsárið. Flottur lax í Fossinum og fleiri komu strax á eftir. Fjörið var rétt að byrja.
Og borgarstjórinn Dagur B Eggertsson landaði skömmu seinna sínum stærsta laxi um ævina líka i Fossinum.
,,Þetta var frábært,“ sagði Dagur B.Eggertsson borgarstjóri skömmu eftir að laxinn kom á þurrt.,,Þetta er sá langstærsti,“ sagði Dagur ennfremur.
Og Þórdís Lóa Þórhallsdóttir fylgdi í kjölfarið með flottan lax sem fór niður úr fossinum og var landað fyrir neðan.
,,Hann fór bara af stað og niður fyrir,“ sagði Þórdís Lóa eftir að laxinn var kominn á þurrt.
Þetta er glæsileg byrjun í Elliðaánum og góðar skúrir í gærkveldi hafa hleypt lífi í árnar og laxinn mætt. Allt tveggja ára laxar, vel haldnir úr sjó.
,,Byrjunin lofar góðu, laxinn er að mæta, vatnið hefur aukist og það er það sem skiptir öllu máli.Þetta er glæsileg byrjun hérna í ánni,“ sagði Jón Þór Ólason formaður Stangaveiðifélags Reykjavíkur og það voru orð að sönnu.
Myndir: María Gunnarsdóttir.