Í frétt AP kemur fram að málið gæti orðið eitt það fyrsta sinnar tegundar í ríkinu frá því að ný og strangari þungunarrofslöggjöf tók gildi árið 2019 og bannaði flestar slíkar aðgerðir eftir að hjartsláttur fósturs verður greinanlegur.
Samkvæmt handtökuskipun sem lögreglan í Kingsland gaf út er konan, Alexia Moore, grunuð um að hafa verið gengin lengra en sex vikur með barn sitt þegar hún tók lyf sem notað er til að framkalla fósturlát.
Dómsgögn sýna að Moore leitaði á sjúkrahús 30. desember vegna kviðverkja. Þar greindi hún frá því að hafa tekið lyfið misóprostól, sem notað er við þungunarrof, auk verkjalyfsins oxykódóns. Moore er sögð hafa fætt fóstrið og lifði það í stutta stund eftir fæðinguna.
Málið hefur vakið töluverða athygli og gagnrýni meðal réttindasamtaka. Dana Sussman, talsmaður samtakanna Pregnancy Justice, sagði í yfirlýsingu að enginn ætti að sæta refsingu fyrir að gangast undir þungunarrof og lýsti ákærunni sem fordæmalausri.
Lög í Georgíu banna þungunarrof eftir að hjartsláttur mælist, sem er yfirleitt um sex vikum eftir getnað – oft áður en konur gera sér grein fyrir að þær séu þungaðar. Moore hefur setið í gæsluvarðhaldi í Camden-sýslu síðan 4. mars, ákærð bæði fyrir morð og vörslu fíkniefna samkvæmt opinberum fangelsisskrám.
