Klæðskiptingur ákvað að nýta hæfileika sína til að halda móður sinni „á lífi“, ef svo mætti komast að orði, í máli sem hefur verið líkt við kvikmyndina Mrs. Doubtfire.

Ítalinn Graziella Dall’Oglio lést árið 2022, 82 ára að aldri. Þetta setti 57 ára son hennar í erfiða stöðu. Þrátt fyrir að vera hjúkrunarfræðingur að mennt glímdi sonurinn við atvinnuleysi og var hann ekki tilbúinn að kyssa tæplega 8 milljónirnar, sem móðir hans fékk árlega í lífeyrisgreiðslur, bless. Hann ákvað því að halda móður sinni á lífi í augum hins opinbera.

Hann falldi lík móður sinnar og leyndi andláti hennar. Þetta gekk ágætlega hjá syninum, allt þar til hann neyddist til að endurnýja persónuskilríki móður sinnar. Voru þá góð ráð dýr. Sonurinn játaði sig þó ekki sigraðan. Hann klæddi sig í föt móður sinnar, skellti á sig farða og hélt svo til bæjarskrifstofunnar þar sem hann ætlaði að þykjast vera móðir sín.

Að sögn yfirvalda voru líkindin sláandi og fátt benti til þess að þarna væri einhver annar en Graziella sjálf á ferðinni. Starfsmaður hjá skrifstofunni sem endurnýjar skilríkin var þó ekki alveg sannfærður. Til dæmis var Graziella óvenju loðin á hálsinum sem er óalgengt meðal eldri kvenna, sem og skeggbroddar sem starfsmaðurinn tók eftir. Á öryggismyndavélum mátti svo sjá að Graziella hafði ekið sér sjálf á bæjarskrifstofuna, þrátt fyrir að vera ekki með bílpróf.

Þegar gengið var á „Graziellu“ gekkst „hún“ við því að vera í raun sonur hennar í dulargervi. Lögregla var þá send á heimili feðginanna þar sem líkamsleifar Grizellu fundust í svefnpoka í þvottaherberginu. Líkið var vel varðveitt og minnti helst á múmíu.

Sonurinn hefur nú verið ákærður fyrir að leyna andláti, fjársvik og fyrir að villa á sér heimildir gagnvart hinu opinbera.

Eins og áður segir hefur málinu verið líkt við þekkta kvikmynd leikarans Robin Williams, Mrs. Doubtfire. En þar lék Williams föður sem var að ganga í gegnum skilnað og ákvað að dulbúa sig sem konu til að geta varið meiri tíma með börnum sínum í dulargervi barnfóstrunnar fröken Doubtfire.