Vekjaraklukkan er erkióvinur margra og snústakkinn verður fljótlega besti vinur margra. En það að snúsa hvað eftir annað gerir ekkert annað en að auka við þreytuna.
En það eru til nokkur ráð sem geta hjálpað þér að vakna hratt og finnast þú fersk(ur) frá morgunstundinni.
Láttu sólarljósið vekja þig – Sólarljósið gegnir mikilvægu hlutverki varðandi dægurrytmann. Þegar þú færð náttúrulega birtu á þig, sendir það skilaboð til heilans um að tími sé kominn til að vakna. Þetta er þó svolítið erfitt í framkvæmd hér á landi á veturna, nema auðvitað maður ætli að vakna mjög seint.
Hættu að nota snústakkann – Það getur verið freistandi að ýta á snústakkann og sofa aðeins lengur en það gerir í raun meiri óleik en gagn. Þegar þú ýtir á snústakkann hefst ný svefnhringrás hjá líkamanum. Þegar þú vaknar síðan nokkrum mínútum síðar, rofnar þessi hringrás skyndilega og þú verður enn þreyttari.
Drekktu vatn – Eftir heila nótt án þess að hafa drukkið, þá skortir líkamann vökva og það getur valdið þreytu og sljóleika. Ef þú drekkur eitt stórt glas af vatni á morgnana, kemst líkaminn í gang og þetta getur hjálpað þér að vakna hraðar. Hafðu vatnsglas við hliðina á rúminu svo þú getir drukkið það um leið og þú vaknar.
Skolaðu andlitið með köldu vatni – Ef það er erfitt að losa líkamann úr viðjum svefnsins, þá er hægt að sjokkera hann með köldu vatni. Skolaðu andlitið upp úr köldu vatni um leið og þú ferð fram úr. Vatnið örvar blóðflæðið og þú vaknar betur. Hinir hugrökku geta líka skellt sér í kalda sturtu.
