Frumbyggjar Papúa Nýju-Gíneu voru einangraðir í gríðarlega langan tíma eftir að fyrsta fólkið kom þangað fyrir rúmlega 50.000 árum. Frumbyggjarnir bera með sér gen frá Denisovans, sem er útdauð manntegund, sem hjálpar þeim sem búa á láglendi að takast á við sýkingar en hjá þeim sem búa hærra uppi, þá koma stökkbreytingar á rauðum blóðkornum sér vel.

Þetta eru niðurstöður nýrrar rannsóknar að sögn Live Science sem segir að frumbyggjarnir hafi verið einangraðir árþúsundum saman og hafi þessi gen frá Denisovans komið sér vel fyrir þá í lífsbaráttunni.

Rannsóknin leiddi í ljós að genið veldur mismunandi stökkbreytingu hjá fólkinu, eftir því hvort það býr á láglendi eða hærra uppi, til að hjálpa því að takast á við mismunandi umhverfisaðstæður.

„Íbúar Papúa Nýju-Gíneu eru einstakir því þeir hafa verið einangraðir síðan þeir settust að í Papúa Nýju-Gíneu fyrir rúmlega 50.000 árum,“ sagði Francois Xacier, meðhöfundur rannsóknarinnar, við Live Science.

Það er ekki nóg með að fjalllent landslagið á þessu eyjasamfélagi geri lífsskilyrðin erfið, smitsjúkdómar fara einnig illa með íbúana en þeir valda um 40% dauðsfalla í landinu.

Ricaut sagði að af þessum sökum hafi íbúarnir þurft að finna bæði líffræðilega og menningarlega aðferð til að laga sig að landinu og því séu frumbyggjarnir „frábær kokteill“ til að rannsaka erfðabreytingar í.

Fyrstu nútímamennirnir komu til Papúa Nýju-Gíneu frá Afríku fyrir rúmlega 50.000 árum. Þeir blönduðust við Densiovans sem höfðu verið til staðar í Asíu í tugi þúsunda ára. Niðurstaða þessara blöndunar tegundanna er að um 5% af erfðamengi frumbyggjanna er frá Denisovans komið.

Rannsóknin hefur verið birt í vísindaritinu Nature Communications.