Drengurinn, Nikko, var á gjörgæsludeild Good Samaritan-sjúkrahússins í West Islip þegar myndband náðist af því þegar Amanda tók drenginn upp þar sem hann lá á bakinu í vöggu sinni og skellti honum nokkuð harkalega á magann.
Foreldrarnir tilkynntu málið umsvifalaust til forsvarsmanna sjúkrahússins og var Amanda rekin örfáum klukkustundum eftir atvikið.
Hún var svo kærð til lögreglu en nú hafa saksóknarar ákveðið að fara ekki lengra með málið þar sem þeir töldu litlar líkur á sakfellingu fyrir stórfellt gáleysi (e. gross negligence). Töldu þeir að ekki væri hægt að sanna, svo hafið væri yfir skynsamlegan vafa, að Amanda hafi stofnað lífi og heilsu drengsins í hættu.
Robert Gottlieb, lögmaður Amöndu, fagnaði niðurstöðunni og benti á að Nikko hefði ekki orðið meint og verið við góða heilsu eftir atvikið. Það væri „skandall“ að málið hefði farið alla þessa leið. Undir það tók Amanda sjálf sem sagðist hafa upplifað afar erfiða tíma að undanförnu.
„Ég hef verið áreitt. Fólk hefur komið að heimili mínu, ég hef fengið bréfasendingar, tölvupósta. Ég á átta ára barn og finnst eins og lífi hennar hafi verið stofnað í hættu.“
Foreldrar Nikko vildu ekki tjá sig um niðurstöðuna í samtali við NBC News. Amma Nikko sendi þó frá sér yfirlýsingu þar sem hún harmaði mjög að málið hefði verið látið niður falla.
