Kona i Ohio, Katie Santry, deildi myndbandi á TikTok nýlega þar sem sjá mátti hana ásamt fjölskyldu sinni grafa upp gólfmottu sem þau fundu grafna í garðinum við heimili sitt. Santry birti svo fleiri myndbönd í kjölfarið þar sem fylgjendum hennar var haldið upplýstum um eftirmálana.
Myndbandið vakti mikla athygli og var fólk fljótt að koma fram með kenningar um hvers vegna mottan hefði verið grafin. Margir töldu einu rökréttu skýringuna þá að lík hefði verið grafið í garðinum, en ekki er óþekkt að líkum sé vafið inn í gólfmottu áður en þau eru grafin því morðingjum sem vilja fela slóð sína, þykir betra að vitni sjái þá með upprúllaða gólfmottu heldur en líflausan mannslíkama.
Santry ákvað að það væri betra að vera viss svo hún hringdi í lögregluna sem hugsaði á sama veg og fylgjendurnir, að þarna gæti verið lík. Teymi var sent á vettvang og framkvæmdi leit í garðinum.
Santry segir í TikTok-myndbandi að þetta sé búið að vera gölnustu og sturluðustu dagar lífs hennar. Hún fékk til sín fjölmennt lið lögreglu og leitarhunda. Tekin voru sýni af gólfmottunni en engin merki fundust um líkamsleifar.
Lögreglumaður greindi frá því í kjölfarið að það séu fleiri ástæður fyrir því að fólk grafi gólfmottur heldur en bara til að leyna morði. Til dæmis eigi fólk það til að grafa eigur sínar þegar það flytur, hreinlega því það nennir ekki taka hluti með sér og nennir ekki heldur að farga þeim með réttum hætti.
