Refsidómar á Íslandi þykja nokkuð vægir þegar við horfum til nágranna okkar í t.d. Bandaríkjunum, en fólki greinir á um hvort fyrirkomulagið sé betra. Það vekur þó athygli bæði hér heima sem og erlendis þegar refsidómar eru í engu samræmi við alvarleika glæpsins. Mál Bryn Spejcher í Bandaríkjunum er eitt slíkt. Hún var dæmd í skilorðsbundið fangelsi og gert að skila af sér 100 klukkustundum í samfélagsþjónustu. Hvert var brotið? Nú hún stakk elskhuga sinn 108 sinnum með hníf.
Bryn, sem er menntaður heyrnafræðingur, kynntist Chad O’Melia vorið 2018 í hundagerði. Þau urðu óaðskiljanleg næstu vikurnar þar til að harmleikurinn átti sér stað. Þann örlagaríka daga hittust þau heima hjá Chad og reyktu saman kannabis. Eftir að skerandi öskur fóru að berast frá íbúðinni höfðu nágrannar samband við lögreglu. Á vettvangi kom lögregla að Bryn í móðursýkiskasti, alblóðug. Hún öskraði látlaust og brást ekki við áskorunum lögreglu um að leggja frá sér hníf sem hún hélt fast utan um. Áður en lögregla náði hnífnum af henni stakk hún sjálfa sig ítrekað í hálsinn.
Verjendur Bryn nýttu þessa undarlegu aðkomu til að vekja samúð dómara. Því var haldið fram að Bryn hafi sturlast tímabundið út af kannabisefninu. Hún hafi því ekki verði með réttu ráði þegar hún myrti Chad. Kviðdómur sakfelldi Bryn eftir aðeins fjögurra klukkustunda umhugsun, en dómari tók þá umdeildu ákvörðun að gera henni óvenju væga refsingu. Foreldrar Chad telja að dómari hafi verið blindaður að sakleysislegu útliti og ungum aldri Bryn. Hann hafi virt ákvörðun kviðdóms nánast að vettugi og ekki gert hlutlægni í ákvörðun sinni.
„Hann sá ekki hver eða hvað Bryn Spejcher er í raun er. Hann afsakaði gjörðir hennar ítrekað,“ sagði faðir Chad við fjölmiðla. Saksóknari málsins, Audry Nafziger segir málið setja hættulegt fordæmi og hér sé kaldri tusku kastað í andlit fjölskyldu hins látna. Dómari sé í raun að segja að það sé í fínu lagi að reykja kannabis og slátra svo annarri manneskju með þremur ólíkum hnífum. Saksóknari sagðist aldrei á ferli síum hafa fengið jafn hrottalegt mál á sitt borð.
Faðir Chad segir það eins furðulegt að Bryn hafi verið ákærð fyrir manndráp af gáleysi. Það geti ekki talist gáleysi að bana öðrum með þremur ólíkum vopnum og 108 stungum. Ekki nóg með það heldur hafi Bryn í raun svipt fjölskyldu tveimur meðlimum. Móðir Chad hafi fallið í alvarlegt þunglyndi þegar sonur hennar dó. Hún hætti að gæta heilsu sinnar og taka inn lyf við sykursýki. Það endaði með því að hjarta hennar gaf sig.
„Hún réði ekki við sorgina og það keyrði hana ofan í eigin gröf,“ sagði faðir Chad grátandi við miðilinn People. Hann lýsir syni sínum, sem starfaði sem endurskoðandi, sem hjartahlýjum manni sem hafi lagt mikið á sig til að hjálpa öðrum. Alls mættu 1200 manns í jarðarför Chad sem var þekktur í samfélaginu sínu meðal annars fyrir að finna leiðir til að tryggja öryggi kvenna á djamminu. Faðir Chad segir að sökum ákvörðunar dómara geti Bryn óáreitt haldið lífi sínu áfram og líklegast muni hún skaða fleiri í framtíðinni.
