57 ára gamall leigusali í Stoney Creek í Ontario í Kanada skaut leigutaka sína, trúlofað par, til bana síðastliðinn sunnudag. Parið leigði hluta af einbýlishúsi mannsins, en hann bjó einnig í húsinu. Leigusalinn læsti sig síðan inni á heimili sínu og var skotinn til bana af lögreglu eftir nokkurra klukkustunda umsátur og skothríð milli mannsins og lögreglu.

Lögreglan bar kennsl á hin látnu, Carissa McDonald, 27 ára, og Aaron Stone, 28 ára, en að sögn lögreglu og CBC höfðu þau átt í deilum við leigusalann vegna myglu í leiguhúsnæðinu. Skaut leigusalinn þau fyrir utan húsið þegar þau reyndu að flýja burt.

McDonald starfaði sem aðstoðarmaður hjá kaþólsku skólastjórninni í heimabæ þeirra og Stone var rafvirki. Voru þau búin að ákveða brúðkaup sitt í ágúst.

Á blaðamannafundi á sunnudag sagðist yfirmaður rannsóknarlögreglunnar harma atvikið og parið væri saklaus fórnarlömb harmleiks, ekkert í fari þeirra eða lífsstíl hefði átt að leiða til þess að þau væru myrt með þessum hætti.