Þegar Jane Sayner var að leita sér að leiguíbúð fyrir margt löngu fann hún tveggja herbergja íbúð með garði í St Albans, sem er norðvestan við Melbourne í Ástralíu. Henni leist vel á íbúðina og tók hana á leigu og hefur aldrei séð eftir því.

Þegar hún hafði búið í íbúðinni í 23 ár hringdi eigandi hennar, John Perrett, í hana dag einn. Hann var lyfsali, knattspyrnumaður, fasteignamógúll og mannvinur. Á sínum 83 æviárum hafði honum tekist að auðgast mjög mikið.

Sayner starfaði á markaði þar til hún fór á eftirlaun. Það þýddi að ráðstöfunartekjur hennar minnkuðu töluvert.

En símtalið frá Perrett breytti öllu fyrir hana. „Ég hugsa stundum um, hvort þetta hafi gerst í raun og veru,“ sagði hún í samtali við 9 Now.

Þegar Perrett hringdi í hana sagði hann henni að hann vildi að hún ræddi við lögmann hans. „Hann er hérna hjá mér og þú þarft að segja honum fullt nafn þitt því ég ætla að gefa þér íbúðina,“ sagði hann.

Perrett glímdi við Parkinson-sjúkdóminn og hafði heilsu hans hrakað mjög þegar þarna var komið við sögu og var hann fluttur á hjúkrunarheimili.

Hann lést í september 2020, 86 ára að aldri. Hann ánafnaði Royal Melbourne sjúkrahúsinu megninu af auðæfum sínum. Þar gekkst hann undir nýrnaígræðslu 1990.

Arfurinn hefur verið notaður til fjárfestinga og mun hann og ávöxtun hans koma sjúkrahúsinu og sjúklingum þess til góða næstu áratugi.

Sayner býr enn í íbúðinni og er Perrett ævinlega þakklát fyrir góðverk hans. „Ég þakka honum enn þá daglega fyrir. Ég segi við mig sjálfa: „Takk John“,“ sagði hún.