Samkvæmt nýjustu tölum frá tyrkneskum yfirvöldum þá létust tæplega 48.000 manns í jarðskjálftunum öflugu sem riðu yfir landið í febrúar.  Reikna má með að þessi tala mun hækka eftir því sem hreinsunarstarfi miðar áfram.

Á fréttamannafundi á laugardaginn kom fram að meðal hinna látnu væru 6.278 útlendingar. Flestir þeirra eru sýrlenskir ríkisborgarar. SÞ telja að um 6.000 manns hafi látist í Sýrlandi en áhrifasvæði skjálftanna náði þangað.

Fyrri skjálftinn var 7,8 og reið yfir 11 tyrknesk héruð þann 6. febrúar.  Nokkrum klukkustundum síðar reið annar skjálfti yfir og mældist hann 7,5.

Að minnsta kosti 230.000 byggingar hrundu eða skemmdust mikið í Tyrklandi í skjálftunum. Sérfræðingar segja að lítið eftirlit með að byggingarreglum sé fylgt, hafi valdið því að manntjónið var svona mikið.