Um miðjan septembermánuð barst lögreglunni í borginni Norfolk í Nebraska-fylki símtal þar sem ónefndur íbúði tilkynnti að hann heyrði öskur og óhljóð frá húsi einu í nágrenninu. Svo virtist sem einhver væri að öskra á hjálp og þess vegna hentist lögreglan í loftköstum á vettvang. Þegar laganna verðir komu að húsinu voru öskrin hins vegar þögnuð og ítarleg leit bar engan árangur. Húsið var mannlaust og allt virtist vera með felldu.
Mánuði síðar, þann 19. október síðastliðinn, gerði ræstitæknir sem var að þrífa húsið hins vegar óhugnanlega uppgötvun. Viðkomandi fann megna ólykt koma frá reykháfi íbúðarinnar og þegar hann fór að rannsaka málið hrökk hann við. Við honum blöstu mannsfætur sem dingluðu niður úr reykháfinum.
Þegar málið var rannsakað kom í ljós að líkið var af hinum 29 ára gamla Zachariah Andrews. Hann sást síðast á lífi þann 15. september en ekki var lýst eftir honum fyrr en í byrjun október.
Fortíð Andrews var vafasöm í meira lagi. Hann hafði fengið á sig nálgunarbann, og brotið ítrekað gegn því, gagnvart konu einni sem hann áreitti í gegnum samfélagsmiðla. Þá fékk hann vægan dóm fyrir að reyna að táldraga tólf ára gamla stúlku sem að hann komst í tæri við í gegnum sölusíðu á Facebook auk dóma fyrir brot gegn valdstjórninni.
Fyrir utan húsið fannst bíll Andrews með allnokkrum stöðumælasektum.
Málið er í rannsókn en flest bendir til þess að Andrews hafi freistað þess að brjótast inn í húsið í gegnum reykháfinn og fest sig með þessum hræðilegu afleiðingum. Á meðan lögreglumenn leituðu í húsinu hafi hann verið að draga síðustu andadrættina í reykháfnum.
